එජාපයත් ආණ්ඩුවත් මුස්ලිම් ජනතාවට සිදුවන දේ ගැන බල බලා සතුටින් කල්ගත කරමින් සිටින්නේයැයි ප්‍රජාතන්ත්‍රවාදී ජාතික පෙරමුණේ බස්නාහිර පළාත් සභා මන්ත්‍රි කුමාර් ගුරුබරන් මහතා පවසා තිබේ. ඔහු ඒ බව පවසා ඇත්තේ කොළඹ 7, බාන්ස් පෙදෙසේ අසාත් සාලි පදනමේ පැවැති මාධ්‍ය හමුවකදීය.
ඔහු එහිදී පවසා ඇති ප්‍රකාශය පහතින් පළවේ.
“විපක්‍ෂ නායක රනිල් වික්‍රමසිංහ මහතා ජ්‍යෙෂ්ඨ දේශපාලනඥයෙක්. ඔහු මේ පාර්ලිමේන්තුව සමඟ හැබෑටම හරි සතුටෙනුයි ඉන්නේ. ඒ වගේම තමයි මුස්ලිම්වරුනට සිදුවන දේවල් දෙස බලමින් ඔහු සතුටෙන් ඉන්නේ. පාර්ලිමේන්තුවේ සභානායක නිමල් සිරිපාල ද සිල්වා මේ සියල්ලම බොරුයි කියලා ප්‍රතික්‍ෂේප කරනවා. වෙච්ච දේ දැන දැනත් කිසිම දෙයක් වුණේ නැහැ කියලා ඔහු ප්‍රතික්‍ෂේප කරනවා. දඹුල්ලේ, අනුරාධපුරයේ වගේම මේ ළඟදි දෙහිවල සිද්ධි සේරම ඔහු ප්‍රතික්‍ෂේප කළා.
වාරිමාර්ග ඇමැති සිරිපාල ද සිල්වා මහතා කියන්නේ ඒ කිසිම දෙයක් වුණේ නැහැ කියලයි. ඒ වගේ වගකීමක් නැති ජ්‍යෙෂ්ඨ කැබිනට් ඇමැතිවරයෙක් මේ රටේ ජනතාව මේ වගේ ආණ්ඩුවක් විශ්වාස කරන්නේ කොහොමද? මගේ කලින් නායකයා දිවංගත කුමාර් පොන්නම්බලම් මහතා නිතර කිව්වේ දේශපාලනඥයන් වශයෙන් අපි අපටම අවංක විය යුතු කියලයි.
මේ රට බහුජාතික බහු ආගමික රටක්. ඒ නිසා මේ රටේ සෑම ජන කොටසකටම සාමයෙන් ජීවත් වීමට අයිතියක් තිබෙනවා.
ජ්‍යෙෂ්ඨ ඇමැති මහාචාර්ය තිස්ස විතාරණ මහතා කිව්වේ ආගමික අසහනයක් ඇති කිරීමට ඉලෙක්ට්‍රොනික් මාධ්‍ය සහ කෙටි පණිවුඩ සේවය (එස්.එම්.එස්.) ඔස්සේ කුමන්ත්‍රණයක් සිදුවන බවයි. එහෙම නම් ඒක රජය මැදිහත් වෙලා නවත්වන්න ඕනෑ. අපිට බොරු කියපු නිමල් සිරිපාල ද සිල්වා මහතාගේ කතා අපි මුළුමනින්ම හෙළාදකිනවා යැයිද ගුරුබරුන් මහතා කීය.
Leave a Reply